Има само еден единствен начин на кој граѓаните можат да влијаат на преговорите кои се закажани во петок во Виена. Тој начин е мирен масовен протест. Колку помасовен и помирен, толку повлијателен.
Ова се зборови на еден европски функционер изречени минатата година кога македонските граѓани ги почнаа првите протести мотивирани од скандалот на прислушувањето. И кога почнаа првите преговори помеѓу четирите партии, ЕУ и САД.
Оние кои стравуваат дека Јоханес Хан, Иво Вајгл, Ричард Ховит и Едвард Кукан ќе ни зготват нова манџа која повторно ќе има горчлив вкус треба да бидат подготвени во тоа јадење да стават зачини според вкусот на Македонија. Доколку македонските граѓани не го пратат својот рецепт во Виена, ЕУ и нејзините претставници ќе зготват брза манџа која нема да им биде по вкус.
Оттука, неопходно е граѓаните да учествуваат на виенските преговори. Преку мирни и масовни протести со конструктивна, кредибилна и изводлива порака каква што почнува да се формулира на протестите.
Да не заборавиме дека за ЕУ единствен приоритет е стабилноста на Македонија а преку неа и стабилноста на целиот регион. Можевме на нашиот пример да видиме дека ЕУ ги поддржува балканските влади кои немаат многу заедничко со демократијата. Се во име на стабилноста. Токму таа формула, а не некаква недокажана корумпираност на Хан, не доведе таму каде што сме сега.
Не вреди да се обвинува комесарот Хан за корумпираност доколку неговите рецепти не ни се допаѓаат како што тоа беше случај во текот на минатата година.
– Не губете време со непродуктивни обвинувања од типот дали Хан е корумпиран или не. Ако некој мисли дека е, тогаш тоа треба да го докаже па да се реагира но тоа е друга приказна, велеше лани истиот функционер кога на дебатите и социјалните мрежи во Македонија се нижеа вакви обвинувања.
Дали во Виена ќе се договори Пржино 2 или Пржино 1бис или нов виенски договор не е воопшто важно. Факт е дека решението на кризата мора од улица да се префрли во институциите и таму да заврши. Но тие институции треба да бидат во ново руво и токму тоа е борбата на луѓето кои секој ден се на протест.
Целта на Хан е протестите да завршат што е можно побрзо и партиите да седнат повторно на маса. Нему не му е многу важно каков договор партиите ќе постигнат. За него е важно тоа да биде направено што е можно побрзо за да може што е можно побрзо да им се врати на другите проблеми за кои е задолжен како на пример Украина.
Во Виена лесно може да дојде до брз договор полн со нови фалинки. За да се избегне тоа, најголемиот притисок мора да дојде од протестите. За да се слушне конечно гласот на народот на кој толку многу се повикува бившиот премиер.
Македонските граѓани можат и мораат да ја натераат Виена да го чуе нивниот мирен но решителен глас. Денес, утре, задутре, во петок а и потоа, протестите треба да продолжат, се додека не се добие договор кој ќе и овозможи на Македонија да излезе на избори. Но не на кредибилни избори, како што вика Хан. Македонија не треба да се задоволи само со кредибилни избори. На Македонија и требаат избори со сите демократски атрибути – фер, демократски и слободни избори.