Од понеделник продолжува скринингот во основните училишта.
Само еден од вчера тестираните 200 ученици бил позитивен на Ковид-19, откри министерот за здравство Беким Сали. Тој вели дека се задоволни од одзивот на родителите, кои за само еден ден доставиле над 4000 одобренија за тестирање.
„Позитивно сме изненадени и од реакцијата на родителите кои само во текот на вчерашниот ден дадоа над 4.000 одобренија за да се направат скрининг анализи кај нивните деца од школска возраст. Тоа го направивме зашто во Комисијата за заразни болести забележавме благо покачување на ново инфицирани лица на возраст од 6 до 14 години и затоа пристапуваме превентивно. Во овој момент резултатите се позитивни и од направени 200 анализи завршени во текот на вчерашниот ден, регистриравме само еден позитивен резултат. Доколку ваквиот тренд продолжи, тогаш ќе нема потреба од продолжување на тие анализи кај учениците“, нагласи Сали.