Самостојниот синдикат на Клинички центри денеска регира на јавниот повик на Комисијата за здравство при ВМРО-ДПМНЕ за сочувување на достоинството на здравствените работници, по објавувањето на буџетот за 2018, со кој како што велат од опозицијата, е предвидено зголемување на патните трошоци и трошоците за репрезентација на функционерите од владата за над 20 насто, додека за докторите специјалисти е предвидено покачување на платите од само 5 проценти
Самостојниот синдикат на Клинички центри ги орфрла обвинувањата дека работат во партиски интерес и истакнуваат дека одлуките ги носат единствено неговите членови.
– Самостојниот синдикат на Клинички центри прашува каде беше оваа Комисија во изминатиот период кога претходната власт и тогашниот Министер за здравство ги воведуваа проектите “плата по учинок“ и електронската контрола на работното време на вработените во јавните здравствени установи преку отпечатоците на нивните прсти. Не слушнавме некој од членовите на оваа Комисија како пратеници во Собранието на Република Македонија да гласаат против предложениот Закон за изменување и дополнување на Законот за здравствената заштита од 21.11.2015 година со сите понижувачки услови, задолженија и казни содржани во него за докторите и останатите вработени во јавните здравствени установи, се вели во соопштението.
Самостојниот синдикат на Клинички центри ги прашува комисиите за здравство на СДСМ и нивните коалициони партнери за нивниот став за предложениот буџет за 2018 година и планираното покачување на платите за докторите и медицинските сестри од 5%.
Од Самостојниот синдикат на Клинички центри најавуваат дека идните нивни постапки ќе зависат од резултатите на преговорите со ресорното Министерство и ќе бидат израз на ставовите на неговите членови.