Close Menu
НОВА ТВНОВА ТВ
  • НАСЛОВНА
  • ВЕСТИ
  • ЗУМ
  • УДАРНО
  • ИЗБОР
  • ТЕМА
What's Hot

Интервју со Павле Гацов: Малите економии имаат мал број алтернативи за справување со американскиот економски протекционизам

April 7, 2025

Интервју со Мирче Јовановски: Последиците од царините на САД – губење работни места и странски инвестиции и намален извоз

April 3, 2025

Интервју со пратеничката на СДСМ Славјанка Петровска: Ни треба повеќе храброст но не во ветувањата туку во исполнувањата

March 25, 2025
НОВА ТВНОВА ТВ
  • НАСЛОВНА
  • ВЕСТИ
  • ЗУМ
  • УДАРНО
  • ИЗБОР
  • ТЕМА
НОВА ТВНОВА ТВ

Самостојноста е изворот на интелигентното функционирање – таа и човечките вредности не се во спротивност

0
By Zoran Ivanov on July 23, 2025 ИЗБОР
СПОДЕЛИ
Facebook Twitter LinkedIn Email

Кога луѓето се здружуваат од позиција на самостојност, а не од страв, тогаш се создава вистински општествено здраво врзно ткиво, вистински здрави заедници. Тоа се заедници базирани на човекови вредности – на почит кон достоинството на секој поединец, на солидарност која произлегува од разбирање и емпатија, на правда која се темели на еднаквост и фер однос, на слобода која не се плаши од одговорноста.

Емилија Целакоска

Секој човек се раѓа сам и сам си заминува од овој свет. Оваа фундаментална вистина за човечкото постоење не треба да нè плаши, туку да нè ослободи и да ни даде јасност во секојдневното функционирање.

Всушност, самостојноста е изворот на интелигентното функционирање. Со прифаќањето на сопствената самостојност, пак, не се плашиме од туѓи мислења, не трепериме пред туѓи очекувања, не се колебаме под притисок на надворешни влијанија. Токму во тие моменти се оформува нашата способност за критичко размислување и автентично одлучување.

Меѓутоа, важно е да се прави разлика меѓу самоста и осаменоста. Самоста е избор – време што си го подаруваме на себе за растење, за разбирање, за внатрешен развој. Осаменоста, пак, е чувство на страв, чувство на беспомошност без други, дека не можеме да функционираме самостојно.

Овој страв од беспомошност заради осаменост е еден од најголемите непријатели на човечката слобода и достоинство. Тој тера на здружување од погрешни причини – не заради љубов, соработка и заеднички цели, туку заради страв од сопствената неспособност. Овој страв тера на подложност на манипулации и тиранија, подготвеност да се прифати некој друг да размислува и одлучува наместо нас, само да не мораме да се соочиме со сопствената одговорност.

Но интелигенцијата стекната во самоста – паметноста на самостојноста, треба да се употреби за самоодговорност и за земање на одлуките во свои раце. Тоа не значи изолација или егоизам, туку свесност за сопствената моќ и одговорност за сопствениот живот и за влијанието што го имаме во општеството.

Кога луѓето се здружуваат од позиција на самостојност, а не од страв, тогаш се создава вистински општествено здраво врзно ткиво, вистински здрави заедници. Тоа се заедници базирани на човекови вредности – на почит кон достоинството на секој поединец, на солидарност која произлегува од разбирање и емпатија, на правда која се темели на еднаквост и фер однос, на слобода која не се плаши од одговорноста.

Во суштина, човековите вредности се тие кои го формираат врзното ткиво на општеството. Тие не се идеолошки конструкти туку основни принципи на човечкото постоење кои ни овозможуваат да живееме заедно во хармонија и взаемна поддршка. Овие вредности се универзални, бидејќи, не само што произлегуваат од самата природа на тоа што значи да бидеш човек, туку се и овозможувач на големи, колективни проекти, како инфраструктура (патна мрежа, водоснабдување, масовна мрежа на електродистрибуција, производствени капацитети…)

Социјалдемократијата, односно добрите социјални политики во демократска слобода всушност НЕ МОЖЕ ДА Е САМО ЕДНА ИДЕОЛОГИЈА ВО АРСЕНАЛОТ НА ПОЛИТИЧКИТЕ ОПЦИИ. Таа мора да биде не-идеологија, односно да претставува основа, база за организирање на општеството според човечките вредности. Тоа мора да е систем што ја признава самостојноста на поединецот, но истовремено обезбедува рамка за солидарност и заедничка грижа за сите членови на општеството.

Ваквиот пристап не се базира на страв туку на разбирање дека човечкото достоинство е недопирливо, дека секој има право на развој на своите потенцијали, и дека заедницата се јакне кога секој поединец може да придонесе според своите способности и да прими поддршка според своите потреби.

Земањето на одговорноста во свои раце не е отфрлање на заедништвото, туку создавање заедништво врз здрави основи. Тоа значи одбивање на тиранијата во сите нејзини форми – била таа политичка, економска или социјална – и градење општество каде што човековите вредности се водечки принцип.

Самостојноста и човечките вредности не се во спротивност – тие се дополнуваат. Самостојниот човек е способен да ги препознае и цени тие вредности, а вредностите создаваат простор за развој на здрава самостојност кај секој поединец.

Тоа е патот кон вистинска слобода – слобода која не се плаши од одговорноста, заедништво кое не се темели на страв, и општество кое ги негува најдобрите човечки особини.

Од Фејсбук ѕидот на авторката.

 

Емилија Целакоска осаменст Самостојност
Share. Facebook Twitter LinkedIn Email
ТИКЕР

Политико: Германија планира да купи оружје во вредност од 377 милијарди евра

October 27, 2025

Пукотници на универзитет во Пенсилванија: Една жртва и шест повредени

October 26, 2025

Двајца словенечки министри дадоа оставки по убиството во Ново Место

October 26, 2025

Косовското собрание не го избра Курти за премиер

October 26, 2025

Француската полиција уапсила двајца осомничени за грабежот во Лувр

October 26, 2025
ФОКУС

Трамп до Путин: Нема да губам време

ВЕСТИ October 26, 2025

 Американскиот претседател Доналд Трамп изјави дека нема да се сретне со рускиот претседател Владимир Путин…

Родителите на загинатите во „Пулс“: Каде беа институциите кога ни изгореа децата?

October 25, 2025

Католичките свештеници за помалку од пет години сексуално злоупотребиле 4.451 лица

October 24, 2025

Данела Арсовска: Советот на Град Скопје и Управниот одбор се одговорни за состојбата во „Комунална хигиена“

October 23, 2025
ТИКЕР

Политико: Германија планира да купи оружје во вредност од 377 милијарди евра

October 27, 2025

Пукотници на универзитет во Пенсилванија: Една жртва и шест повредени

October 26, 2025

Двајца словенечки министри дадоа оставки по убиството во Ново Место

October 26, 2025

Косовското собрание не го избра Курти за премиер

October 26, 2025

Француската полиција уапсила двајца осомничени за грабежот во Лувр

October 26, 2025
CIVICA
Facebook
  • Редакција
  • Маркетинг
  • Политика на приватност
© 2025 НОВА ТВ

Type above and press Enter to search. Press Esc to cancel.