Англискиот в.д. селектор се осврна на сликата што ја затекнал при преземање на привремената функција од Сем Алардајс и со пофални зборови за Џо Харт по ремито против Словенија (1:1) во Љубљана
Герет Саутгет, в.д. селектор на Англија, со остри тонови по мечот против Словенија (1:1) во мундијалските квалификации. Покрај тоа и со пофални зборови за голманот Џо Харт чии одбрани, според него, биле од пресудно значење за освоениот бод во Љубљана.
„Наследив хаос во репрезентацијата и моравме да го смириме бродот. Наша цел е пласман на Светското првенство и можеби овој бод н` води кон тоа“, истакна привремениот кормилар на „Гордиот Албион“ чиј договор со Фудбалската асоцијација се однесува на четири натпревари.
Саутгејт го наследи Сем Алардајс на клупата по скандалот минатиот месец во кој новинари на британски „Телеграф“ открија коруптивни навики на, сега, претходниот селектор. Во дебито на клупата ја совлада Малта на гости со 2:0, а синоќа ремизира против Словенија на Среќко Катанец, екс предводник на Македонија. Англичаните се лидери во групата Ф со седум бода, два повеќе од Литванците и Словенците.
„Свесни сме дека можеме подобро. Словенија направи шанси по наши грешки и при прекини и тука мора да се поправиме. Му должиме многу на нашиот голман за овој бод. Беше фантастичен. Кога е смирен е најдобар. И самиот го знае тоа“, додаде Саутгејт чии избраници само трипати се заканија кон противничкиот гол.
Следен ривал на Англија во квалификациите за СП 2018 е Шкотска. Мечот ќе се одигра на 11 ноември на „Вембли“. Четири дена подоцна Англичаните ќе играат и пријателски натпревар против Шпанија, репрезентација на која ќе ~ гостува Македонија во Гранада на 12 ноември.