Истражувањето покажало дека досега се изгубиле дури 40 % од површината на хималајскиот ледник од што добар дел по 70-тите години од минатиот век
Глобалното затоплување предизвикува исклучително брзо топење на мразот на Хималаите, покажа истражувањето што е објавено во весникот Scientific Reports.
Тие ледници се топат побрзо отколку во било кој друг регион , поради што на две милијарди луѓе им се заканува недостаток на вода. Во светот, само на Антарктикот и на Арктикот постои повеќе мраз отколку на Хималаите, пишуваат германската и хрватската новинска агенција ДПА и ХИНА, пренесува Ал Џезира Балкан.
-Откривме дека мразот на Хималаите се топи барем десет пати побрзо од просечната брзина забележана за време на изминатите векови, изјави Џонатан Сервик, главен автор на научната работа и професор на Универзитетот во Лидс.
– Мразот почна да се топи со зголемена брзина дури во последните неколку десетлетија а се подудара со појавата на климатските промени , предизвикани од човековата активност, се наведува во извештајот.
Недостасува време
Истражувањето покажало дека досега се изгубиле дури 40 % од површината на хималајскиот ледник од што добар дел по 70-тите години од минатиот век.
Жителите на планините и долините по теченијата на реките Ганг, Инд и Брахмапутра како и многу други, со вода се снабдуваат точно од овие ледници.
Научниците кои работеле на истражувањето дури се на мислење дека недостасува време за спречување на идните катастрофи.
-Ова истражување е само уште една потврда дека климатските промени се забрзуваат и дека значајно ќе влијаат на целата нација и регион, изјавил коавторот на трудот Симон Кук од Универзитетот во Дандеј.