Петнаест оперирани пациенти на Клиниката за очни болести при Клиничкиот центар во Скопје се соочуваат со сериозна инфекција на очите, изјави Гоце Чакаровски, претседател на Комисијата за здравство во СДСМ.
На денешната прес конференција тој од здравствените власти побара да одговорат:
-Дали е точно дека салите на Клиниката за очни болести се затворени за операции и од кога? Дали причина за прекинот на операции на Офталмолошката клиника е инфекцијата што ја добиле 15 пациенти откако биле оперирани? Дали и какви последици ќе имаат луѓето на кои им се инфицирани оперираните очи? Инсистираме на одговор, што е причината за инфекцијата? Дали причината за инфекцијата е поради несоодветни болнички услови за работа или нешто друго?, рече Чакаровски.
Информациите што ги поседуваат во партијата, рече тој дека упатуваат на тежок скандал со употреба на загаден препарат за очи, со којшто биле третирани оперираните пациенти.
-Дали употребениот препарат Авастин е причината за тешката инфекција?
Бараме граѓаните да ги добијат сите потребни информации во врска со случувањата на Клиниката за очни болести на Клиничкиот центар во Скопје. Ако се откажани закажани операции, надлежните мора да кажат дали имаат обезбедено алтернативни решенија за итните случаи, рече Чакаровски.