Денеска сме тука да го кажеме она што секој студент го чувствува секојдневно: Владата на ВМРО-ДПМНЕ ги остави студентите сами, се наведува во денешното соопштение на Центарот за комуникации со јавноста на СДСМ – прес-конференција на Трајче Стојчевски, претседател на СДММ.
Во време кога животните трошоци растат вртоглаво, кога храната станува сè поскапа, студентскиот оброк остана замрзнат на 140 денари и власта оваа година нема намера да го зголеми.
Тоа значи дека денес студентите реално имаат помал оброк отколку пред две години.
Кога ВМРО-ДПМНЕ кога беше опозиција, гласно бараше студентскиот оброк да биде 160 денари. Денес, кога ја имаат власта, молчат и не прават ништо. Уште една лага во низата на ВМРО-ДПМНЕ.
Студентите знаат дека мерката студентски оброк е мерка на СДСМ, и последен пат во 2023 година, износот беше зголемен од 120 на 140 денари, вели Стојчевски.
Но тој потенцира дека оттогаш цените пораснаа многу побрзо. Стојчевски напомена дека според податоците на Државниот завод за статистика, во јуни 2025 година трошоците на животот се зголемени за 4,5% во споредба со лани.
Не може да има пари во најголемиот буџет во историјата за папаја, манго и луксузи на функционерите, а за студентите да нема пари.
СДММ бара зголемување на сумата за студентски оброк на 160 денари.
Бидејќи власта не ги есапи студентите бараме системско решение: автоматска индексација според цените на храната или јасна формула за годишно усогласување.
Наместо папаја и манго за функционерите, власта нека обезбеди средства за студентите.
Студентите не бараат луксуз. Бараат достоинствен оброк и елементарни услови за живот и студирање, рече на прес конференција Трајче Стојчевски, претседател на СДММ.