Советничката група од Сојузот за иднината при Советот на Општина Карпош, донела одлука да не учествува во изборот за претседател на Советот на Општина Карпош.
„Револтирани од начинот на свикување на оваа седница, кој е апсолутно спротивен со Законот за локална самоуправа, Статутот на Општина Карпош и Деловникот за работа на Советот, укажуваме на фактот дека, ваквиот каубојски начин на свикување на седница на Совет е мотивиран исклучиво од потребата да се скрие срамот на градоначалникот Стевчо Јакимовски, заради неговото коалицирање со ВМРО ДПМНЕ“ соопштуваат од Центарот за комуникации на СДСМ.
Како што информираат седницата била свикана вчера преку телефон во 19.30 часот, намерно пред првомајските и велигденските празници, со цел, на мала врата да помине и да не предизвика турбуленции во јавноста, информацијата дека Стевчо Јакимовски, мимо волјата на граѓаните ја подари Општина Карпош на ВМРО ДПМНЕ.
„За ваквиот чекор, граѓаните на Општина Карпош, членовите и симпатизерите на СДСМ, се сомневаат веќе подолго време, денес, вистината излезе на виделина и се официјализира договорот помеѓу ВМРО ДПМНЕ и Стевчо Јакимовски, постигнат во еден угостителски објект во Горно Нерези“ се вели во соопштението.
Тие не сакаат да му помогнат на Стевчо Јакимовски во покривање на овој срам, и ги потсетуваат граѓаните дека за ова зборувале и во текот на изборната кампања, меѓутоа дел од членовите и симпатизерите на СДСМ биле успешно изманипулирани од страна на Стевчо Јакимовски.
Во понатамошното делување, Советничката група од редовите од Сојузот за иднината, ќе биде конструктивна опозиција, ќе делува во интерес на граѓаните и ќе ги прифаќа сите предлози и иницијативи кои ќе бидат за доброто на граѓаните на Општина Карпош.