Социјалдемократскиот сојуз писмено реагира на одлуката на Македонската академија на науки и уметности да го тргне од веб-страницата бројчаникот кој го мереше јавниот долг во секунда.
„Зоран Ставрески, кумот на поранешниот премиер Никола Груевски, скриен како во бункер очајно се обидува да го спаси својот кумашин инволвиран во криминал до гуша.
Уште неуплатени средствата од вчерашната аукција на државни хартии од вредност, Зоран Ставрески денес објави проспекти за нова аукција. Побарува повеќе од 93 милиони евра.
Бројчаникот на МАНУ можеби е блокиран, но во реалноста тој врти, постојано се зголемува долгот на сите граѓани ви земјава.
Единствена грешка кај него беше темпото кое покажуваше задолжување од 3 евра во секунда.
Вистината е дека Владата на РМ, преку Министерството за финансии, во првите 75 дена од годината ги задолжува граѓаните на Р.Македонија со темпо од 9.5 евра во секунда.
Притисоците од страна на режимот кон институциите, судството и науката, само за кратко можат да ја одложат неизбежната казна кон сите оние кои прават злодела врз својот народ.“ се вели во соопштението на СДСМ.
По реакцијата на владејачката партија МАНУ го тргна бројчаникот од веб-страницата, но не отстапи од тоа дека сумите за задолжувањето се точни.
„Бројчаникот кој го мери јавниот долг на Република Македонија изразен во апсолутни броеви, но и релативно во однос на бруто-домашниот производ на земјата, е изготвен во рамките на Центарот за компјутерски науки и информатички технологии при МАНУ, за потребите на нивните истражувања, и е објавен од страна на соработник на Центарот, без претходно да биде информирано раководството на МАНУ и раководителот на Центарот.
Бројчаникот, според тоа, не изразува официјални ставови на МАНУ.
Академијата и секој нејзин член, и понатаму остануваат отворени за информирање на јавноста за нивната работа.” појаснија вчера од МАНУ.