Социјал-демократскиот сојуз на Македонија, на конгресот кој се одржува денеска во „Холидеј Ин“ во Скопје со почеток од 12 часот, ќе избере нов лидер.
За оваа позиција има тројца кандидати: Зоран Јовановски, Зоран Заев и Кире Наумов. Четвртиот кандидат Игор Ивановски вчера се откажа од кандидатурата. Но, делегатите, кои ќе ги има 705, имаат право да предложат и други кандидати на самиот конгрес.
Тие, пак, ќе добијат можност за обраќање до конгресот од 15 минути по што ќе следи тајно гласање. За избран ќе се смета кандидатот кој ќе добие 50 отсто од гласовите, при што мора да гласаат барем една третина од делегатите. Покрај ова, ќе се бира и нов централен и надзорен одбор.
Почетокот на конгресот ќе биде јавен, но изборот и прогласувањето на новите носители на функциите ќе бидат затворени за јавноста.