СДСМ промптно излезе со реакција на соопштението на ВМРО, во кое беше одбиен предлогот на Црвенковски за одложување на локалните избори.
Во соопштението меѓу другото се вели: Партијата на Груевски уште еднаш покажа дека нема елементарно чувство, разбирање и грижа за националните интереси на Македонија.
СДСМ ја повторува понудата: Нашиот конструктивен предлог е ако на локалните избори на советничките листи на здружената опозиција таа освои барем еден глас повеќе од листите на коалицијата околу ВМРО-ДПМНЕ тогаш да има предвремени парламентарни избори на 29 Септември.
„Бидејќи Никола Груевски постојано тврди дека е сигурен победник на претстојните локални избори, никој не може да најде логично оправдување зошто тој упорно избегнува да се соочи со волјата на граѓаните, а со тоа премиерот свесно инвестира во драматично продлабочување на политичката криза со крајно штетни последици за земјата, кои неминовно ќе одат исклучиво на негов товар.
– Денес, претседателот Црвенковски упати пораки на сериозна загриженост за актуелните состојби, која ја споделуваат сите наши граѓани. Во денешната прес конференција на СДСМ, немаше ниту една навреда, а уште помалку „маалски изрази“. Тоа е најдобар доказ како размислува една државотворна партија каква што е СДСМ, за разлика од Груевски и ВМРО ДПМНЕ кои се коцкаат со државните интереси“, соопшти СДСМ.
„Приземните, вулгарни формулации и дрски дисквалификации со кои се служи ВМРО ДПМНЕ во реакцијата, се на истата линија и уличарски пристап кој премиерот го користеше сите изминати денови за сериозната политичка криза во која се наоѓа земјата. Ако некој промовира политички мачоизам, тоа е само Никола Груевски, кој тоа го прави свесно и плански загрозувајќи ја иднината на државата“, додава СДСМ.