Жестока дебата на конгресот на СДСМ. Делегатите со барање раководството да се симне меѓу народот.
Тројцата кандидати за претседател на СДСМ манифестираа единство. Како знак на обединување и во име на партијата тројцата кандидати во фоајето се напија по едно кафе.
Претходно, кандидатите за претседател на СДСМ ги претставуваа своите програми на 14. Конгрес на Партијата.
Струмичкиот градоначалник и кандидат за претседател Зоран Заев беше прв од кандидатите кој им се обрати на делегатите.
– Со мене како лидер на СДСМ ќе го декласираме ВМРО-ДПМНЕ – рече Заев во своите 15 минути и вети консолидација на партијата.
Кире Наумов, пак, својата програма ја презентираше во полупразната сала на хотелот „Холидеј Ин“. Голем дел од делегатите на Конгресот ја напуштија салата и не го проследија неговото излагање.
Претходно, членот на иницијативниот одбор што бараше Бранко Црвенковски да остане лидер на СДСМ, Наум Буревски, го напушти Конгресот откако досегашниот лидер на партијата не прифати да поднесе нова кандидатура.
Буревски, пак, рече дека 30 илјади членови бараат Црвенковски да остане лидер на СДСМ, а на прашањето зошто иницијативниот одбор инсистира на останување на актуелниот лидер Буревски вели:
– Не сакам да навлегувам во светот на Црвенковски. Наше беше да настапиме во име на членовите кои се за оваа иницијатива. Бидете сигурни дека нема да поддржиме друг кандидат – истакна тој.