Во 8-та година од своето камено владеење, Никола Груевски, повторно во најава, информира
за нов Клинички центар во Скопје, реагира СДСМ.
Во соопштението до медиумите се вели дека “уште 2010, на 20 октомври, од ВМРО-ДПМНЕ соопштија дека Владата на Груевски започнала со активностите за проектирање и изградба на нов Клинички центар, но ова е четврта година оттогаш, а нов Клинички центар досега нема.
Што се однесува за најавената изградба на нова Клиничка болница во Штип, ова е 5-то вакво
ветување досега. На изборите во 2006-та година премиерот вети реконструкција на штипската болница. На изборите во 2008, Груевски и ВМРО-ДПМНЕ повторно ветија реконструкција на болницата. 5 години подоцна, на изборите во 2011, премиерот излезе со ветување за нова болница во Штип. 2 години потоа, на локалните избори во март, Груевски ја вети новата болница за ноември 2013. Во јануари 2014, новата болница во Штип е се уште “во најава“.
За жал, дури ни во најавите на Груевски и на Тодоров соопштени денеска, не се наоѓа одделението за физикална терапија и рехабилитација во Велес, иако заменик министерот
за здравство, пред 4 месеци, на 27 август 2013, соопшти за издвоени 140 илјади евра за
негова реконструкција.
Каде се парите и реконструкцијата може само да се претпоставува. Во меѓувреме пациентите се препраќаат дома да се лекуваат со апчиња, а во болницата, и тоа во мизерни услови, се задржуваат само оние на кои им е неопходен болнички третман.
За неискрените политики на власта во здравството говори и фактот што Владата не дозволува гасификација на Медицинскиот центар Струмица, иако гасот како најевтин енергенс е на достап во овој град, а Груевски и Тодоров, повторно во најава, зборуваат за гасификација на идниот Клинички центар во Скопје.
Од сето ова може да се констатира дека Никола Груевски и во 2014-та продолжи со лицемерните политики на себе рекламирање, на штета на граѓаните на Република Македонија”, се вели во соопштението на СДСМ.