Од Комисијата за култура на СДСМ обвинуваат дека додека министерот држи говори за „културна дипломатија“ и „креативни визии“, културниот сектор во државата се соочува со секојдневно понижување, неизвесност и институционален распад.
Според опозицијата, постои сериозно лицемерство во изјавите на Љутков за „долгорочни стратегии“, во време кога ресорот е доведен во една од најтешките состојби во последните години.
Како клучни аргументи за ваквата состојба, од СДСМ ги посочуваат:
– Протестите и револтот во културниот сектор;
-Партизацијата и политичките пресметки на сметка на уметниците;
-Доцнењето на националните програми и блокираните проекти;
-Институциите оставени без визија и основни услови за работа;
-Хаосот во распределбата на буџетските средства и игнорирањето на стручната јавност;
-Целосната неспособност на менаџментот за реализација на капитални проекти.
Министерот денес зборува за „Скопје 2028“, а не може да обезбеди ниту нормално функционирање на ресорот што го води. Особено навредливо е што се повикува на културното наследство, додека во исто време сведочиме на негрижа, урбанистички притисоци и уништување на историски објекти и културни простори низ државата, реагираат од СДСМ.
Обвинувања за „туристичка дипломатија“ во странство
Од СДСМ потенцираат дека за време на досегашниот мандат на Љутков не е отворен ниту еден нов Културно-информативен центар (КИЦ) на Македонија во странство, што според нив ја обезвреднува тезата за развиена меѓународна афирмација. Опозицијата тврди дека наместо системска поддршка за уметниците, министерот го искористил мандатот за лични патувања.
Јавноста гледаше како Љутков три пати го прошета светот по разни опскурни настани и поводи, за кои никој не дозна ниту што биле, ниту зошто било потребно токму тој да присуствува. Наместо системска културна дипломатија, добивме туристичка дипломатија на министерот, обвинуваат од партијата.
Компарација со претходното владеење
Од СДСМ направија паралела со периодот кога тие раководеле со извршната власт, потсетувајќи дека во тоа време биле реализирани најголемите инвестиции во културата, била зголемена поддршката за уметниците и било вратено достоинството на културните работници.
Опозицијата заклучува дека актуелната власт, наместо да гради европска престолнина на културата, го претвора Скопје во „престолнина на импровизацијата, кичот и политичката самопромоција“, порачувајќи дека зад големите зборови на министерот нема реални резултати туку само „пропадната ПР-претстава“.