Љупчо Николовски од СДСМ вели министерот за администрација и информатичко општество должел објаснување пред јавноста “зошто бега“ најавувајќи дека од септември нема повеќе да биде дел од Владата.
Николовски вели, најблиските министри го напуштале премиерот Никола Груевски, а со тоа доаѓала слободата и се ставал крајот на режимската власт.
– Дали избега од страв да се соочи со граѓаните за најголемата партизација на државната администрација што ја направи власта на Никола Груевски? Политизацијата на државата и државните инситуции, констатирана во сите релевантни меѓународни извештаи за Македонија, се спроведуваше преку министерството со кое раководеше токму Ивановски, вели Николовски во денешната изјава.
Тој како друга можна причина за заминувањето на Ивановски ја потанцираше и состојбата со медиумите во земјава.
– Дали можеби Ивановски избега поради катастрофалната состојба во медиумите во Македонија, исто така констатирана во сите меѓународни извештаи? Медиумскиот мрак, загрозената медиумска слобода и генерално состојбата во медиумите е во целосна надлежност на министерството со кое раководеше токму тој, Иво Ивановски, дополни членот на СДСМ.
Николовски вели пред да замине, јавноста очекува одговори од министерот Ивановски, и прашува дали неговото заминување крие нешто дополнително скандалозно за што јавноста сè уште не знаела.