„Министерот Никола Тодоров два дена бесрамно ја криеше и заштитуваше Ивона Талевска, на тој начин обидувајќи се да ги сокрие и бесрамните малверзации и манипулации на власта со парите на граѓаните“, рече на денешната прес-конференција Петре Шилегов, портпарол на СДСМ.
– Денеска ќе ја расветлиме шемата на огромниот медиумски корупциски скандал со милионскиот тендер за фирмата ВИСАРИС МКД, на миленичката на Груевски, Ивона Талевска. Документот што ќе го добиете и вие, ги разобличува шемите на власта на Никола Груевски коишто веројатно не се применуваат само за овој тендер.
Шилегов објави официјален документ од Централниот регистер кој покажува дека доминантен сопственик на фирмата ВИСАРИС МКД ДОО Скопје, уште при основањето е, внимавајте, не мајката Лимба, туку самата уредничка бизнисменка Ивона Талевска. Цели 9 месеци Ивона Талевска е доминантна сопственичка на фирмата за медицинска опрема ВИСАРИС ДОО Скопје.
„Девет дена откако е распишан милионскиот тендер од страна на министерството за здравство, Ивона Талевска се повлекува од фирмата и му ги дава акциите на малцинскиот партнер, Марко Петровиќ. Тендерот е распишан на 11 декември 2012 година, а Ивона Талевска се повлекува на 20 декември 2012 година. ВИСАРИС МКД ДООЕЛ Скопје конкурира на тендерот и за 4 месеци го добива милионскиот бизнис од Никола Тодоров.
– Само шест месеци од добиениот милионски бизнис, во фирмата ВИСАРИС МКД Скопје се враќа бизнисменката Талевска, преку мајката Лимба Талевска, а самата Ивона Талевска е лице за контакт.
– Ова господине министре не е малку неетичко, туку е класичен пример за медиумска корупција од невидени размери. Овде не станува збор за немање етика, туку за задоволување на материјалните апетити на луѓето кои ги остваруваат медиумските апетити и интереси на вашиот шеф Никола Груевски, рече Шилегов.