Министерот за финансии Кирил Миноски ги лажел странските кредитори и медиуми дека е обезбедено потребното мислење за правната важност на еврообврзницата од Министерството за правда, обвинија денеска од СДСМ.
„Миноски вчера самиот призна дека дополнително ќе барал мислење од Министерството за правда. Ова е скандалозно бидејки министерот за финансии постапил противзаконски! Ова е директно прекршување на Законот за јавен долг, член 18 став 6.
Министерството за финансии морало да обезбеди претходно потврда за правната важност на еврообврзницата.
Според допис којшто е испратен од Министерството за финансии, агенцијата Ројтерс и другите медиуми објавија дека издавањето на еврообврзницата е усогласено со Министерството за правда.
Сега е јасно зошто со денови молчи министерот за правда Валдет Џафери на прашањето дали Министерството за правда издало мислење за правната важност на еврообврзницата“, соопштија од СДСМ.
Тие велат дека го предупредуваат министерот Џафери, дека покрај другите нелегални дејства во моментот на издавање на еврообврзницата, ставката странски задолжувања во Буџетот за 2016 е 370 милиони евра.
„Ребалансот на Буџетот се уште не е усвоен во Собранието на Р.Македонија.Министерот за правда, Владет Џафери добро нека размисли дали ќе биде соучесник во извршување на ова финансиско злосторство! Укажуваме дека сите инволвирани лица во издавањето на незаконската 450 милионска еврообврзница ќе мора да понесат одговарност“, велат од партијата.
Тие исто така го прашаа гувернерот Димитар Богов дали има интерес со тоа што присуствувал на конференциската врска кога е договорено огромното задолжување на граѓаните во стотици милиони евра.
„Дали можеби аукцијата за избор на изведувач за изградба на милионската барокна зграда на НБРМ го натера Богов да присуствува на конференциската врска во понеделникот кога власта ги задолжи граѓаните 450 милиони евра, плус камати, со еврообврзницата?
Богов тврдеше дека издавањето на еврообврзницата е во надлежност на Владата и Министерството за финансии. Но потоа се најде во друштвото на владините претставици кои преку конференциска врска го договорија милионското задолжување“, велат од СДСМ.