Градот ќе се задолжи со 5 милиони евра за подземната сообраќајница од мостот Гоце Делчев до почетокот на булеварот Кузман Јосуфовски Питу.
Реагираше опозицијата според која градоначалникот Трајановски повторно предлага да донесеме одлука за задолжување на градот Скопје преку издавање општински обврзници за изградба на подземната сообраќајница.
„Ова е повторување на одлуката од минатата година кога градот воопшто не успеа да изнајде финансии ниту да го започне овој значаен капитален проект. Советниците од Сојузот за иднината сметаат дека во овој момент нема никаква потреба од нови задолжувања за Градот Скопје затоа ние предлагаме средствата наменети за овој значаен
капитален и витален проект за граѓаните на Скопје да се обезбедат од прераспределба на
средствата од буџетот на Градот Скопје за 2014 година наменети за панорамското тркало
барокните фасади и неколку други непотребни проекти“, изјави денеска Предраг Трпевски, советник во град Скопје од опозицијата предводена од СДСМ.
Според него со ова градот нема да де задолжи за дополнителни 5.000.000 евра и ќе се избегне плаќањето на камати со парите на граѓаните на Скопје. Подземната сообраќајница е капитален проект на градот Скопје.
Советниците на власта пак велат дека не станува збор за ново задолжување, туку за спроведување на тендерска постапка која првично падна поради високите понудени суми од пријавените компании.
Најавата на Градот за изградба на уште два плоштада во центарот на градот, еден пред седиштето на ВМРО-ДПМНЕ, објект што во моментот се гради (плоштад ВМРО) и уште еден во делот помеѓу објектот на Министерството за надворешни работи и МОБ (плоштад Мајка Тереза), денеска се најде на дневен ред пред градските советници.
Според најавата, пари за изградба на плоштадите ќе се обезбедат буџетот на Градот и од Министерството за култура.
Опозицијата предложи оваа точка да се симне од дневен ред, бидејќи изградбата на плоштадите не е во надлежност на градската власт, туку на општина Центар.
„Сакаме да потсетиме дека Коце Трајановски не може да ги менува законите и правилата на игра според потребите на ВМРО-ДПМНЕ. Тие работи се јасно дизајнирани со законската регулатива. А, граѓаните на Општина Центар, на последните избори свртеа грб на проектот „Скопје 2014“, за чиј дел можат да се сметаат и овие позиции“, рече Софија Куновска, координатор на советничката група на СДСМ.