СДСМ пред малку одржа прес конференција на која секретарот на СДСМ, Андреј Петров истакна:
Сојузот за иднината не одлучи да ги бојкотира претстојните локални избори затоа што немаше време за кандидатски листи туку заради целосната неодговорност на власта и нивниот партиско полициски пуч!
Во тој контекст, претседателот Бранко Црвенковски, во име на здружената опозиција предложи разумен, конструктивен и фер план за излез од кризата: Ако на локалните избори советничките листи на Сојузот за иднината освојат барем еден глас повеќе од листите на коалицијата околу ВМРО-ДПМНЕ да има предвремени парламентарни избори.
Токму заради стравот од соочување со волјата на граѓаните ВМРО-ДПМНЕ го одби овој предлог.
Денес продолжи партиско полициското насилие, невидено за парламентарни демократии и за земја која претендира да биде членка на ЕУ и НАТО.
Пратениците на власта планираат во Собранието, кое го испразнија од опозицијата со полициско насилство, да донесат измени на Изборниот законик.
Најсрамно во сето ова е што соопштувањето на овие погубни политики Никола Груевски им ги додели на Ставревски и Јанкуловска кои беа извршители на бркањето опозициски пратеници на црниот понеделник.
Добро е што Никола Груевски ги одбра токму нив двајца да држат вакви прес конференции, за секој случај да не заборавиме кои беа егзекуторите на правната држава и демократскиот поредок во Република Македонија.
(Ова е интегрален текст од пред малку одржаната прес конференција на СДСМ)