СДСМ соопшти дека веќе е подготвен предлог закон со кој ќе се зголеми минималната плата.
-Минималната плата веќе ќе беше зголемена, ако не се блокираше работата на Собранието и ако не се одолговлекува со давањето на мандатот за составување на Влада. Новата Влада, веднаш по формирањето, во консултации со социјалните партнери, ќе го пушти во собраниска процедура законот за зголемување на минималната плата. Минималната нето-плата ќе се зголеми на 12.000 денари и ќе важи и за индустријата за текстил, облека и кожа. Тоа значи дека околу 42.000 работници само од трите индустрии ќе носат дома по 2.410 денари повеќе секој месец. Сите други работници кои примаат минимална плата, ќе добиваат по 1.920 денари повеќе од досега, изјави Драган Тевдовски, претседател на партиската Комисија за економија.
Образложувајќи ја неговата содржина, тој рече дека за да нема отпуштања вработени, ќе се формира Фонд за поддршка на животниот стандард за вработените во индустрија за текстил, облека и кожа, којшто на работодавачите ќе им покрие дел од покачувањето на платата.
За да се спречат злоупотреби контролата за исплата на минималната плата, покрај Инспекторатот за труд, ќе ја врши и Управата за јавни приходи.
Тој најави дека освен оваа, новата Влада ќе донесе и серија на други мерки кои ќе прават притисок платите да растат, што се клучен услов за подигнувањето на животниот стандард на мнозинството на граѓани кои живеат само од својот труд, а немаат приходи од капитал.