Социјалдемократскиот сојуз преку дополнителниот заменик министер за финансии Кире Наумов, ќе поднесе тужба до Управниот суд на РМ.
СДСМ преку тужбата ќе бара поништување на одлуката на Државната изборна комисија со која е одлучено дека „емисијата на државни хартии од вредност и државни записи од страна на Министерството за финансии на домашен пазар не претставува акт или документ кој се однесува на правни, финансиски и кадровски прашања поврзани со организација на изборите“, па поради тоа не подлежи на согласност, односно одобрување од страна на Дополнителниот заменик министер.
Од СДСМ сметаат дека соегашниот состав на ДИК, чиј мандат е истечен на 08.11.2015 година, немал надлежност да одлучува по ветото на Наумов.
– Исто така тужбата ја поднесуваме и поради тоа што самата одлука е целосно незаконски формулирана. Имено согласно Законот за јавен долг, член 18, задолжувањата со државни хартии од вредност се вршат како на домашен, така и на меѓународен пазар на капитал. Согласно истиот закон, задолжувањето се врши со емисија на краткорочни и долгорочни хартии од вредност. Во самата одлука, ДИК третира и државни записи, кои во Законот за јавен долг, во делот на задолжување со издавање на државни хартии од вредност никаде не се споменуваат, дополнува во своето објаснување СДСМ.
Партијата порачува дека ќе ги искористи сите механизми за да спречи изборна корупција и злоупотреба на парите на граѓаните.