СДСМ денеска пред Основниот суд 2 одржа прес конференција во знак на протест поради, како што велат, бесправното задржување на Претседавачот на Советот на Општина Центар, Мирослав Шиповиќ и неговите соработници во притвор. Потпретседателот Дамјан Манчевски вели дека е неразбирливо продолжувањето на притворот и покрај тоа што истрагата е завршена и тие нема како да влијаат на сведоците.
-Не постои ниту еден правен основ за претседателот на Советот на Општина Центар и соработниците да се во притвор. Ниту можат да го повторат делото ниту да влијаат на истрагата. Шиповиќ не само што нема намера да бега, туку самоиницијативно предвреме се врати во Македонија. Дополнително, раководството на СДСМ понуди сопствен имот како уште една гаранција дека намерата на Шиповиќ е во судска постапка да ја докаже својата невиност.
Ова е кршење на законот кое само уште еднаш потврдува дека Шиповиќ и соработниците се политички затвореници. Денес на сите во Македонија им е јасно дека ова е политички прогон за прикривање на криминалот од Скопје 2014.
Ние во СДСМ цврсто сме убедени дека претседателот на Советот на Општина Центар и неговите соработници не се виновни. Затоа, уште еднаш апелираме да им се дозволи да се бранат од слобода и својата невиност да ја докажат во нормален судски процес.
На тој начин ќе се деблокира работата на Општина Центар и ќе се почитува јасно изразената волја на граѓаните на локалните избори, рече Манчевски.