Социјалдемократскиот сојуз денеска реагира дека согласно Методологијата за прочистување на Избирачкиот список што ја усвоија во ДИК претставниците на сите 4 партии од власта и опозицијата, теренски ќе бидат проверени спорните и фантомски гласачи во Избирачкиот список.
„Никола Груевски и неговите соработници 10 години ги лажат, крадат и малтретираат граѓаните, одржувајки се на власт на криминален начин. Сега ќе се соочат со нивните фантоми.
Да не сонуваат Груевски и ВМРО-ДПМНЕ дека можат да избегаат од нив. Ќе бидат теренски проверени спорните и фантомски гласачи во Избирачкиот список. Ова беше договорено, откако ВМРО-ДПМНЕ го одби предлогот за целосна теренска проверка на Избирачкиот список.
10 години ВМРО-ДПМНЕ и ДУИ не ги решија проблемите во Избирачкиот список.
Си знаат тие, растел бројот на фантомски гласачи во Избирачкиот список, но затоа што од ВМРО-ДПМНЕ и ДУИ ги додавале и множеле за да крадат избори.Највисоките функционери на власта и ВМРО-ДПМНЕ се под истрага за злосторничко здружување за изборни измами. “ се вели во партиското соопштение.
Од ВМРО-ДПМНЕ пак тврдат оти фантомските гласачи се креирана лага на опозицијата.
– Обидот е всушност таканаречено меко приземјување. Од 500 илјади, колку што лажеа тие и нивните медиуми, нивната битка во текот на вчерашниот ден се сведе на обид барем да се проверат 150 или 160 илјади. Се со цел за да не биде одеднаш, од 500 илјади да паднат на 5.000 проверки, па одлагањето на изборите на 24ти април да ја изгуби својата смисла, и да се види големата лага и манипулација што ја правеа веќе 2 години во земјата, реагира ВМРО-ДПМНЕ.
Најголемата партија на власт потенцира дека проверката не значи дека некој е фантомски гласач или дека некој направил некоја неправилност.
Инаку вчера седницата на Државната изборна комисија беше закажана за во 18:30 часот, но иако седниците треба да бидат јавни, новинарите беа оставени да чекаат надвор до 22 часот без притоа да им биде одговорено на прашањата што всушност се правеше зад затворени врати во ДИК без јавноста да има увид во тоа.