Министерот Никола Тодоров го призна наместениот тендер во здравството, што ќе однесеше милион евра пари на граѓаните во семејната фирма на Ивона Талевска, реагира СДСМ по објавата на Тодоров дека го поништил тендерот.
Најавата на Тодоров за раскинување на договорот со фирмата ВИСАРИС МКД е потврда за криминалниот тендер што го обелодени СДСМ. Уште колку вакви незаконски тендери се доделени министре Тодоров и премиере Груевски? И уште колку милиони државни пари завршиле во џебови на функционери и послушници на власта?, прашува опозицијата.
– Стана практика функционерите на ВМРО-ДПМНЕ, кога ќе бидат фатени во криминал, да се повлекуваат со убедување дека тоа го правеле за општо добро. Како што министерот за транспорт и врски Јанакиески се повлече од скандалозната продажба на земјиште во Центар за едно евро по квадрат, откако се открија намерите за криминална и не законска продажба.
– Со оглед на тоа што дел од опремата е стигната на Клиниката за радиологија и лекарите веќе излегоа во јавност со информации дека таа е нефункционална, СДСМ бара од министерот Тодоров и од ВМРО-ДПМНЕ тие да ја покријат финансиската штета од скандалозниот тендер, сметаат до СДСМ.
СДСМ бара политичка одговорност за сите инволвирани во медиумско корупцискиот скандал ВИСАРИС.