– Пред да се расфрла со нови виртуелни инвестиции, Никола Груевски треба да одговори пред граѓаните за сите лажни, виртуелните индустриски зони коишто со години се само празни ливади, се вели во соопштението од СДСМ.
Во 2012 година, се наведува натаму во партиското соопштение, „Груевски најавуваше изградба на технолошко-индустриска зона во Гевгелија, локалитет Прдејци. Денеска, после цели три години наместо индустриска зона зјае празна ливада. Ветената индустриска зона Опаленик, уште пред 7 години, требаше да биде изградена во близина на патот Крушево-Прилеп, кај селото Алданци. Наместо индустриска зона, со години стои празна ливада како симбол на лажните, виртуелни инвестиции на Никола Груевски“.
„Единствените реални „инвестиции“ на Никола Груевски се парцелите на Водно, мерцедесот од 600 илјади евра, очилата од 60 илјади долари, провизиите, тендерите за споменици вредни 630 милиони евра…Во реалноста ниту имаа странски инвестиции ниту има нови работни места. Корупцијата во изминатите години однесе многу работни места и избрка многу странски инвестиции“, се истакнува во соопштението.
Од СДСМ истакнуваа дека „граѓаните знаат дека Груевски излажа и за италијанската Орланди, турски Шишеџам, Хајер и Тривју, индиската Мадерсон, француската Монтипе, израелската Газит Глоуб, Еуро Италија, Искра Словенија, Биротекник Отомотив, Грудхост од Данска…“.