СДСМ денеска, повикувајќи се на финансискиот извештај, објави дека ВМРО-ДПМНЕ должи 400.000 евра за кампањата на Гордана Сиљановска.
-Тоа е спротивно на член 71 од Изборниот законик каде е наведено дека сите трошоци за кампањата исклучиво треба се покријат од средствата на таа сметка, рече портпаролот на партијата Костадин Костадинов. Тој праша дека дали токму овој незаконски долг од 400.000 евра е причината што ВМРО-ДПМНЕ го кочи изборот на прв човек на Државниот завод за ревизија, односно дали ВМРО-ДПМНЕ се плаши дека независна институција ќе поведе постапка и ќе ги истражи сите индиции за нивното непочитување на законот?
Костадинов ги повика надлежните институции да извршат детални анализи и да излезат со одговори пред јавноста.
Претседателот на ВМРО ДПМНЕ Христијан Мицкоски, денеска на прес конференција, одговарајќи на новинарско прашање рече дека во моментов во ВМРО-ДПМНЕ има ревизија.
– Затоа ја охрабрувам Ревизијата којашто денеска и деновиве коишто следат е во ВМРО-ДПМНЕ и вршат ревизија на сметката за претседателските избори за тековното работење, што побрзо да ја завршат и што побрзо да се расчисти и оваа конструкција и оваа лага којашто деновиве гледам дека се обидуваат како тема да ја залепат, но некако не им успева. Ние подготвени сме да сносиме одговорност за последиците од сето тоа, рече Мицкоски на прес конференцијата.