Македонија мора да ја воведе таканаречената Младинска гаранциска шема, како државите членки на ЕУ бидејќи половина млади во Македонија (51%) не учествуваат во пазарот на трудот.
Ова е заклучокот од заедничката работилница на Советите на СДСМ за ЕУ интеграции, за образование, за социјална политика и за локална самоуправа.
Суштината на оваа шема е државата да преземе обврска на младите да им понуди квалитетни понуди за вработување, натамошно образование, практиканство или дообука во рок од четири месеци откако ќе станат невработени и ќе се пријават во Агенцијата за вработување или откако ќе го напуштат формалното образование, велат од СДСМ.
Со жалење констатиравме дека иако Република Македонија ги има донесено сите потребни стратегиски документи за решавање на проблемот на невработеноста на младите, ништо практично не е направено за да се смени состојбата со младите. Згора на тоа, младите се третираат како маргинализирана осиромашена група во општеството, а не како ресурс за развој на државата, вели Лидија Димова претседател на Советот за ЕУ интеграции на СДСМ.
Средствата наменети за активните мерки за вработување во Буџетот на Република Македонија од година во година се намалуваат. Ако во 2011 година тие биле околу 500.000.000 денари (или околу 8 милиони евра), во 2012 година нивниот износ се зголемува на околу 600.000.000 денари, односно околу 10 милиони евра, за во 2013 година износот повторно да падне на 550.000.000 денари, што е околу 9 милиони евра. И во буџетот за 2014 година, бројката е намалена на 500.000.000 денари, односно 8 милиони евра.
Стратегијата за вработување на млади до 2015 година има и финансиска конструкција. За жал, средства за неа гледаме само кај IV-та компонента на ИПА, но потсетуваме дека ИПА може само да ги надополнува државните средства, но никако и да ги замени! На ваков начин се загрозува и принципот на дополнителност на ИПА, а со тоа и опасност од губење на средствата, велат од СДСМ.
За таа цел СДСМ предлага итно да се воведе инклузивен начин – Младинска гаранциска шема, која ќе создаде сигурност кај младите и ќе ја зголеми нивната доверба во институциите на системот. ИПА IV-компонента да се стави во функција на ваквата шема. Тековните активни мерки за вработување мора да се ревидираат и да се отворат и за граѓанскиот сектор. Мора да се воспостави Националната рамка за квалификации, и да се признае неформалното и аформалното образование. За полесно социјално вклучување на неактивните млади во локалните заедници, пожелно е да се создаде и Младински портал. Во најблиското соседство веќе има вакви шеми така што соработката на младите може да се одвива и на регионално ниво и да се формираат регионални мрежи на бизнис-ангели предлагаат од СДСМ.
Кај мерките за субвенционирање нови вработувања, СДСМ предлага да се воведе извозен ваучер (покривање на трошоците за хотел, авион, саемско учество итн.) на извозно ориентираните претпријатија кои би се обврзале да вработат или да примат млади практиканти. За да се зголеми самовработувањето, субвенционирањето мора да биде 10.000 евра, а банките треба да се вклучат од самиот почеток на развој на новата шема. Овој износ на грант може да послужи како залог за земање комерцијален кредит од банка.
Исто така од СДСМ предлагаат изградба на Полигон-центри за обука на дефицитарни стручни кадри како и воспоставување на социјални претпријатија во кои можат активно да се вклучат поголем број млади на локално ново.