Претседателот на Комисија за одбрана и член на Извршниот одбор на СДСМ Максим Димитриевски, на денешната прес-конференција во Кампот на слободата пред Влада изјави дека МВР мора да каже по кои критериуми ги делеле парите за акцијата во Куманово и дали е точно дека такви награди добиле лица кои немале никаква активност во борбените дејствија.
-Цели два месеца нема одговор од најповиканите Груевски и неговата власт за тоа кој и зошто се обиде да ја дестабилизира Македонија. Кој дозволи криминалните групи да влезат во Македонија, зошто власта не ги спречила? Кого штити Обвинителството и два месеца молчи?
Зошто никој не поднесе командна одговорност во МВР? Дали за оваа операција Митко Чавков е назначен за нов министер за внатрешни работи, наместо да биде повикан на одговорност заедно со поранешната минитерка Гордана Јанкулоска?
МВР мора да каже по кои критериуми ги делеше финансиските средства и дали е точно дека такви награди добиле и лица кои немале никаква активност во борбените дејствија? Овој случај нема да дозволиме да се заборави. Груевски ќе мора да одговори кој беше сценаристот,а кој режисер на кумановската акција, рече Димитриевски.
Полициската акција во Куманово се случи пред точно два месеца. Во акцијата животот го загубија 8 припадници на специјалните единици, а 37 беа повредени.