Франција, Германија, Холандија и Данска се обидуваат да состават текст со компромис за отпочнување на ЕУ преговорите со С.Македонија и Албанија, со кој би се одложило носењето на одлука до април или мај следната година.
Идејата е Франција да презентира предлог за реформирање на процесот на проширување во јануари – информира европскиот дипломат.
Париз се противи на отворањето преговори со двете земји се додека целиот процес за пристапување не е реформиран.
Засега, нема договор за вметнување на датум во текстот. На софата седат Ангела Меркел, Емануел Макрон, Марк Рут и Мет Фредериксен, според информациите од друг дипломат.
– Ова е наша последна шанса, Чарлс Мишел (идниот претседател на Европскиот совет) се чини дека има слаб апетит за проширување – брифира дипломатски извор.
По опсежната дискусија меѓу лидерите за аспирациите на С.Македонија и Албанија да се придружат на ЕУ, Туск побара пауза, надевајќи се на договор за надминување на француското опирање на почетокот на преговори за двете балкански нации.
Непосредно пред почетокот на Европскиот совет во Брисел, францускиот претседател Емануел Макрон при пристигнувањето во Советот им се обрати на новинарите и во таа пригода не кажа ништо за прашањето за проширувањето и датумот за почетокот на преговорите, кое ќе биде една од точките на Самитот.
Макрон во врска со прашањето за давањето датум за почеток на преговорите за Северна Македонија и Албанија, е единствениот кој засега најавува блокада. Тој во околу петминутното обраќање пред новинарите, не кажа ништо по ова прашање, но затоа се задржа подолго на постигнатиот договор за Брегзит.