Сезоната на потрага по нови европски шефови е отворена. Се бараат нови шеф(ици) на Европската комисија, Европскиот совет, на надворешната европска и безбедносна политика и на Европскиот парламент на местата на Хозе Мануел Баросо, Херман Ван Ромпеј, Кетрин Ештон и Мартин Шулц.
Според францускиот весник Ле Монд еден од кандидатите за некое од овие места е веројатно и сегашниот генерален секретар на НАТО Андерс Фог Расмусен.
Според Ле Монд, Расмусен, либерал, е аутсајдер во битката за шеф на Европската комисија. Тој се уште е на функција до оваа есен па нема да може да учествува во европските избори закажани за мај и со тоа не може да имги замрси сметките на двајцата засега официјални кандидати за ова место – Финецот Оли Рен кого Македонија добро го познава и Белгиецот Ги Верофштад, двајцата либерали.
Слаби се шансите на Расмусен да стане шеф на европската дипломатија на местото на Ештон поради тоа што неговата земја, Данска, се избори за опт-аут во европската безбедносна политика.
Но, Ле Монд смета дека може лесно да се случи Расмусен да го наследи Ван Ромпеј. “Поранешен премиер, уметност на компромисот и умреност кои се карактеристика на Скандинавците, искуство на светската сцена и познато име” заклучува весникот.
Не се знае исто така кој ќе стане првиот човек на НАТО. Мандатот на Расмусен беше продолжен за да може тој во септември да го води самитот на алијансата. Засега има само еден официјален кандидат за НАТО а тоа е поранешниот шеф на италијанската дипломатија Франко Фратини. Од белгиски извори се дознава дека заинтересиран за функцијата е министерот за одбрана Питер Де Крем а од британски се споменува кандидатурата на Лиам Фокс поранешен министер за одбрана.