Сеад Кочан е хоспитализиран во приватна болница велат од Кривичниот суд. Во меѓувреме тој поднел ново барање за одложување на затворската казна, откако Судот два пати ги одби неговите барања и тој требаше да почне со издржување на затворската казна од 4 години и 8 месеци за случајот „Труст“.
„До надлежниот судија за извршување санкции доставено е ново барање за одлагање на издржувањето на казната затвор по кое барање судот веднаш се обрати до приватната клиника каде е хоспитализиран осудениот за добивање на целокупната документација поврзана со барањето.
По добивање на неопходната документација надлежниот судија дополително ќе одлучи дали барањето ќе биде разгледано и по истото ќе се одлучува или истото ќе биде отфрлено“ соопштија од Кривичниот суд.
Кривичниот совет при Основниот кривичен суд – Скопје, на 30 јули ја одби како неоснована жалбата на Кочан со која се бараше одлагање на извршување на затворската казна.
„По разгледување и ценење на жалбата, советот донесе решение со кое жалбата ја одби како неоснована и го потврди решението на судијата за извршување санкции според кое осуденото лице е должно веднаш да се јави на издржување на затворската казна, а одлуката на советот е писмено изработена и експедирана до странките“ соопштија од Судот.
Бизнисменот Сеад Кочан е осуден на 4 години и 8 месеци затвор за „Труст“ за прикажување на лажна документација за добивање на тендер од ЕЛЕМ вреден 17 милиони евра.