За жал, по првиот круг, кога победив убедливо против кандидатот на ДУИ, лидерот на ДПА ме продаде многу евтино и се подготвија заедно со ДУИ да ја сменат волјата на Студеничани, објасни Садику
Градоначалникот на Студеничани, Азем Садику, сега е дел од големото семејство на Алијанса, објавија денеска од Алијанса за Албанците на официјалниот Фејсбук профил.
Инаку, Садику беше единствениот градоначалник избран од редовите на ДПА на неодамнешните локални избори.
„Градоначалникот на Студеничани г-дин Азем Садику сега е дел од големото семејство на Алијансата за Албанците. Нему му се придружија и локални структури кои не прифатија пазарење со актуелната власт. Победи праведноста и чистотата!“, објавија од Алијанса за Албанците.
А Садику својата одлука денеска ја оправда со фактот дека бил предаден од неговиот актуелен лидер Мендух Тачи, објави Алсат.мк.
„Прво ви кажувам дека останав во ДПА до крај, бев кандидат на ДПА и на изборите победив како кандидат на ДПА. За жал, по првиот круг кога победив убедливо против кандидатот на ДУИ, лидерот на ДПА ме продаде многу евтино и се подготвија заедно со ДУИ да ја сменат волјата на Студеничани. Но, наидоа на клинец, иако државниот апарат беше силно ангажиран, со власта, со полицијата, но и покрај нив малку ги зголемија своите гласови со поддршка на Алијанса и со поддршка на граѓаните на Студеничани. Повторно победив на изборите“, рече Садику.
Тој вели дека последниот контакт со Тачи го имал по првиот круг од локалните избори кога тој му посакал победа.
„До крајот бев лојален на идеологијата на ДПА, но по ова предавство од ДПА решив да влезам во редовите на Алијанса“, рече Садики, објави Алсат.мк.