Безбедносната состојба е стабилна и нема индиции кои би укажале дека би довеле до загрозување на суверенитетот и територијалниот интегритет на Република Северна Македонија, истакна претседателот на државата Стево Пендаровски по 14-тата седница на Советот за Безбедност на која седница за прв пат како нови членови присуствуваа премиерот Димитар Ковачевски и Министерката за одбрана Славјанка Петровска.
– Ако било што доведе до поинаква состојба, институциите се целосно подготвени да реагираат, прецизира Пендаровски.
Што се однесува до состојбата во Западен Балкан, во контекст на тензиите во Босна и Херцеговина, Советот оценил дека тие се намалени и како резултат на активностите на Меѓународната заедница која предност дава на дијалогот, изјави Пендаровски.
На седницата станало збор и за состојбата на Украинско – Руската граница.
– На седницата се дискутираше и за тензиите во поширокиот регион, поточно на украинско-руската граница. Имајќи предвид дека станува збор за две држави кои граничат со таканаречената евроатлантска зона на одговорност, Северна Македонија како членка на НАТО беше должна да ги направи, и ги направи, сите неопходни подготовки, повторувам, подготовки, за можните сценарија во зависност од тоа како ќе се одвива текот на настаните во наредниот период во тој дел од светот. Ги поздравуваме дипломатските напори кои се одвиваат на различни нивоа, кои ги преземаат главните фактори во меѓународната заедница со кои им се дава шанса на дијалогот и на преговорите, а не на оружјето и на воинствената реторика. Во тој дел од светот има мали, засега симболични знаци за деескалација на реториката во изминативе неколку денови, но сѐ уште е рано за прогнозирање како ќе се одвиваат настаните понатаму, затоа што во моментов тој дел од светот сеуште останува потенцијално високо ризична зона, изјави Пендаровски.
На прашањето на НоваТВ околу можноста за испраќање македонски војници под знамето на НАТО или под знамето на друга сојузна команда во воена или во мировна мисија во Украина, шефот на државата го даде следното објаснување :
– Трупи на НАТО вклучително и наша војска нема да видите во борбени дејствија на Украинска територија во случај таму тензиите да дојдат до отворен конфликт. Тоа е нашиот став. Но зошто го правиме ова досега. Има една фраза во НАТО која се вика генерирање на сили. Секоја сериозна организација и која има силна милитарна компонента во себе,а НАТО е тоа, во случај на кризи на своите граници кои можат да ескалираат во нешто посериозно, е должна да разработи неколку сценарија. И во тој контекст тие викаат во случај на ваков конфликт што вие ќе понудите како членка на НАТО и само во таа смисла се зборува за подготвеност и за кревање на нивото на мобилност на армиите но не да се учествува со борбени трупи на територија на држава која не е членка на НАТО. Само и само ако се случи напад на некоја членка од Балтикот наваму, во тој случај може да дојде и да разговараме за такви ситуации кога ќе дојде збор за активирање на членот 5 од Вашингтонскиот договор, рече меѓу другото Пендаровски.
(М.Т)