Министерот за надворешни работи Никола Димитров, на неговиот Фејсбук профил објави вест дека “oд вкупно 3o пријавени, 7 граѓани се согласија да бидат во задолжителен карантин и денес се вратија”.
-Ја информирам јавноста дека денес во утринските часови на Меѓународниот аеродром Скопје слета полски хуманитарен чартер лет за да си ги врати дома полските државјани затечени во Северна Македонија. Во соработка со полското МНР, понудивме враќање во земјата на македонските државјани во Полска кои побарале помош преку нашата Амбасада во Варшава.
Од вкупно 3o пријавени, 7 граѓани се согласија да бидат во задолжителен карантин и денес се вратија. Добредојдовте дома! Благодарност до Полска!”- напиша Димитров на Фејсбук.
Освен тоа, сите македонски државјани кои се заглавени во меѓугранични простори или аеродроми, а сакаат да се вратат во земјава, да се пријават во најблиското државно конзуларно претставништво (ДКП) до денеска во 18 часот. Тоа ќе може да направат на е-маил адреси и телефоните на македонските ДКП во земјите во кои се наоѓаат или во најблиското ДКП во соседна земја или во регионот. Министерството за надворешни работи и Министерството за транспорт најавија организирање на хуманитарни летови и конвои по што ќе треба да минат 15 дена во задолжителен државен карантин.
Како што соопшти вчера министерот за надворешни работи, Никола Димиров, моментно има околу 2.300 македонски државјани од кои најмногу затечени во европските земји. Според него, пријавувањето е важно за да се има прецизна евиденција и податоци и само на тој начин ќе може веднаш да почне со организирација на летовите и конвоите.
„Сите кои се немаат пријавено, а сакаат да се вратат во земјава, да го сторат тоа до недела во 18 часот, бидејќи ова нема да биде процес што ќе се одвива континуирано. Се работи за големи трошоци, голема организација, државата нема да може редовно да врши организација на вакви хуманитарни конвои“, истакна Димитров и уште еднаш порача дека сега не е време за патување во странство.
Министерот најави и дека во наредните денови ќе биде организиран хуманитарен конвој од Црна Гора каде има околу 70 наши граѓани. И тие ако дојдат во земјава ќе бидат ставени во задолжителен карантин. Трошоците ќе бидат на товар на државата.
Се контактираат и сите земји од Шенген зоната – доколку некои граѓани, поради актуелната состојба со коронавирусот, го пробијат рокот за максимум престој од 90 дена да не сносат правни последици.