Претседателот на Здружението на новинари Насер Селмани остро реагира на амандманот на владејачката партија со кој државата ќе финансира 50% од домашната продукција на националните телевизии. Ако ова остане во законот, вели тој за НОВА, состојбите во медиумите ќе наликуваат на оние од 1945 година.
-Ова е веќе директно мешање на државата во медиумите. Со ова државата влегува пола – пола во националните телевизии, влегува во бизнисот на приватните телевизии. И потоа ние од тие телевизии ќе бараме да бидат независни?! Ние протестираме поради владините реклами, а власта оди уште еден чекор понатаму – ќе дава екстра пари, јавни пари во приватни бизниси. А намерата е многу јасна – уште повеќе да се засили контролата врз медиумите, вели Селмани за НОВА.
Овој амандман беше изгласан ноќеска, во 2 часот по полноќ. Денеска власта го одби амандманот на Социјалдеморактискиот сојуз со кој тие предложија да се укинат донациите во реклами од медиуми за партии за време на избори. Министерот Иво Ивановски само го одби амандманот без да образложи зошто е против да се спречи праксата медиумите да бидат партиски донатори.