Претседателот на Здружението на новинари на Македонија, Насер Селмани, за „24 Вести“ ги објаснуваа реакциите на новинарите и на еснафските здруженија, како и вчерашниот протест пред скопскиот Основен суд 1 заради апсењето на новинарот Нова Македонија, Томислав Кежаровски. Тој вели дека протестите се организирани зашто не се знае во што се состои обвинението, а и не е познато зошто е одредена мерката притвор.
– Не сме убедени дека мерката притвор е легитимна. Ние знаеме дека таква мерка се одредува кога постои опасност да се напушти земјата, да се повтори делото или да се влијае на сведоците. Во овој случај нема легитмна цел дека тоа може да се случи зашто ако постоела таква опасност колегата сето ова можел да го направи во изминатите 4 години – вели Селмани.
На прашањето дали ваквото апсење може да стане навика, пракса, да се повтори во некои идни случаи и да служи како средство за заплашување на новинари, Селмани вели дека тоа не не би требало да изненади.
– Имајќи ја предвид целата ситуација, иницијативата за донесување на закон, притисоците на медиумите, мислам дека нема да биде далеку од вистината ако овој случај има намера таква порака да прати – истакнува тој.
За новиот нацрт-закон за медиуми Селмани смета дека освен директивата на ЕУ, која се спомнува во него, се друго е спорно – општите одредби, начинот на кој е поставен регулаторот, поставеноста на Македонската радио телевизија и слично. Тој додава дека очекува истите забелешки да ги повтори и експертот од Германија, кој е ангажиран од Советот на Европа за анализа на законот.
Во однос на условите за почеток на дијалог со Владата, Селмани вели дека за тој да биде ефективен треба да се обезбеди гаранција договорите што се постигнати да се спроведуваат, зашто инаку дијалогот се компромитира кога една од страните не го почитува договореното. Како пример тој го посочи токму Законот за медиумите за кој вели дека начинот на кој е предложен е спротивен на договорите постигнати во работната група.