Во моментов во просториите на Сојузот на стопански комори се одржува неизбирачкото собрание на Здружението на новинари каде се презентираат извештаите за финансиското работење на организацијата, но се зборува и за новиот закон за медиуми и инцидентот во Собранието кога новинарите беа избркани од галеријата кога се носеше буџетот за 2013.
Во врска со новиот закон за медиуми, претседателот Насер Селмани рече дека ЗНМ не се откажува од намерите да добие повеќе време за јавна расправа пред да се донесе законот.
“Има обид кај владата да се извртуваат работите, но тоа нема да им помине ниту кај нас, ниту во Европската комисија. До каде е извештајот на Анкетната комисија? Нека излезе па ќе седнеме на маса. Тоа што не сме повеќе во преговори со владата не значи дека не сме заинтересирани за законот за медиумите. Ние имавме поддршка од повеќе амбасади во земјава кои ќе не помогнат во напорите да издејствуваме барем 5 до 6 месеци за расправата.
-Ние чекаме владата да се изјасни дали ќе одговори на нашите барања за продолжување на рокот за јавна расправа, имаме некакви навестувања дека сакаат да одговорат, но знаете, суета е во прашање, ама еве нека не речат дека тие нас не послаушале, нека речат што сакаат, еве нека речат дека тие се загрижени за слободата на медиумите”, рече Селмани на расправата
Новинарот Зоран Фидановски од Алфа телевизија рече дека ЗНМ не смее да се врати на дијалог со владата се додека не се најдат одговорните за инцидентот во Собранието.
“Бев во галеријата и знам што се случи. И нас не не интересира, ние инсистираме на расчистување на тој случај. Без тоа расчистување стојам на позицијата да не се продолжат преговорите со владата. Имаат комисија, ние бараме заклучок од таа комисија која конкретно ќе одговори што треба и што ќе се направи”, вели Фидановски