Од Центарот за управување со кризи информираат дека во некои од поплавените места состојбата е сеуште сериозна.
Евакуирани се околу 140 жители од 40 куќи од селото Пишица, како и околу 800 грла добиток.
Критична е состојбата и со браната во Слатино, Охридско.
Во кумановскиот регион евакуирани се 585 лица од Средорек и за нив се обезбедени храна, вода за пиење, ќебиња и греење. Оштетувања има на мостот на реката Петроѓница на стариот пат Куманово – Крива Паланка.
Во општина Липково по течението на Случанска и Матејачка река има излевања по целиот тек, а најпогодени се селата Опае и Лопате.
Од поројните дождови и надојдените води во кочанското село Горни Подлог се урна семејната куќа на Елена и Јордан Јорданови. Јорданови ноќта ја поминале кај соседите заедно со своите две малолетни деца.
Во општина Штип пак, во реонот на Ново Село извршено е испумпување на водата од куќите и поставен е насип од вреќи со песок покрај патот на реката Брегалница.
Во општина Свети Николе водата е навлезена во околу 100-тина куќи.
Поплавено е целото село Пиперево и земјоделските површини, како и дел од населените места Ангелци, Градашорци, Владевци и Василево. Поплавени се дел и од селата Секирник, Зубово, Моноспитово, Босилово и Турново, а отежнато е движењето на возила по магистралниот пат Струмица – Република Бугарија.
Поради излевање на реките поплавени се домови и оризови посеви и во општините Кочани и Чешиново – Облешево. Патниот правец село Тркање – Бање – Спанчево – Соколарци – Жиганци е во прекин кај селото Соколарци каде е однесен дел од патот.
Во скопската општина Илинден поради покачување на подземните води поплавени се околу 20-тина куќи.