Обединетите Нации (ОН) објавија извештај во кој се изнесуваат злосторствата против човештвото на Северна Кореја. Извештајот заклучува дека “систематски, широки и груби нарушувања на човековите права се извршени и се извршуваат во Народната демократска Република Кореја”.
Претседателот на Комисијата на ОН, Австралијанецот Мајкл Кирби, изјави во понеделникот дека стотици функционери од Северна Кореја се одговорни за овие злосторства како и нивниот водач Ким Јонг-ун.
Јужна Кореја верува дека овој извештај ќе доведе до процес пред Судот на правдата за да се казнат злосторствата.
„Владата верува дека извештајот на Комисијата, кој содржи резултат на длабока истрага кои покажуваат колку е тешка ситуацијата на човековите права во Северна Кореја, ќе донесе и свест во меѓународната заедница”, се вели во соопштението на јужно-корејското министерство за надворешни работи. Сеул вели исто така дека е спремен да ја продолжи својата соработка со меѓународната заедница за да се подобри ситуацијата кај неговиот северен сосед.
Извештајот беше поздравен и во Вашингтон но Кина, сојузник на Пјонгјанг, изјави дека ќе се спротивстави предметот да биде поднесен во Судот на правдата.
Извештајот што го изработи Комисијата на ОН, креирана во мај 2013 година во Женева, вели дека “стотици илјади политички затвореници умреле во логори во последните 50 години”.
Тие, според извештајот, се елиминирани преку намерно спроведени гладувања, присилна работа, егзекуции, торура, силувања и одбивање на правото на репродукција извршено преку казни, насилни абортуси и убивање на деца. Правниците кои се дел од Комисијата сметаат дека во моментов 80 до 120 илјади политички затвореници се наоѓаат во логорите и
затворите во земјата.