Истрагата за новороденчето кое во саботата беше пронајдено во двор во Арачиново сеуште тапка во место. Не се знае кој се изживувал на штотуку роденото бебе, кое прво било давено, а потоа му бил пресечен јазикот.
Иако од медицинската евиденција лесно може да се дознае за сите жени кои биле бремени во последниот период, доколку мајката била жител на населбата на Арачиново, МВР сеуште не излегува со конкретни детали.
Нема информации ниту дали човекот во чиј двор било оставено новороденчето има било каква поврзаност со случајот. Новороденчето на
Клиниката за детски болести во саботата било донесено во многу тешка состојба со минимални можности за преживување.
-По приемот веднаш беше констатирано дека има крвави подливи од давење на вратот, а јазикот му беше пресечен до половина, од каде што крвареше обилно. По интервенција на максилофацијален хируг, јазикот на бебето беше зашиен, по што беше веднаш приклучено на апарати за дишење изјави за НОВА доктор Аспазија Софијанова директор на Клиниката за детски болести.
Станува збор за нормално родено бебе, не е недоносено, машко, тешко 2 380 грама. Неговата здравствена состојба во моментот се стабилизира, а лекарите велат дека му се зголемуваат шансите за живот.
На клиниката се згрозени од состојбата на бебето и од начинот на кој некој се изживувал над него. Во МВР за НОВА потврдија дека работат на истрагата, а во расчитувањето на случајот се вклучени и социјални работници.