Министерката за труд и социјална политика Јагода Шахпаска попладнево имаше онлајн состанок со Мисијата на Меѓународниот Монетарен Фонд, предводена од Бергљот Бјорнсон Баркбу, на кој меѓудругото, се разговараше за заздравувањето на економијата после пандемијата Ковид – 19, вработеноста на младите, формализирањето на неформалната економија, како и движењето на работната сила на долг рок.

Министерката Шахпаска информираше дека и во време на економска криза, предизвикана од здравствената криза, нашата држава бележи историски најниско ниво на невработеност од 15,9 проценти, што е јасен показател дека политиките на Владата, како и шесте пакети економски мерки дале позитивен резултат.

„И минималната и просечната плата во изминатиов период имаат тенденција на раст. Позитивниот тренд на платите продолжи и во 2021 година, просечната нето плата за септември 2021 година е за 5,3 проценти повисока во однос на истиот месец 2020 година. И во период на пандемија, во согласност со законската регулатива овозможивме усогласување и на минималната плата“, нагласи министерката Шахпаска.

Претставниците на мисијата на ММФ се интересираа какви мерки Владата презема за да им помогне на ранливите категории на граѓани, во делот на потребите за електрична енергија и други енергенси.

Министерката Шахпаска информираше дека со измените на Законот за социјална заштита, во време на пандемија, за речиси 36.000 приматели на Гарантирана минимална помош, како и за околу 7.500 приматели на социјална пензија обезбеден е додаток од 1000 денари за енергенс во текот на целата година, а не само за шест месеци како што беше претходно. Дополнително, Владата подготвува Програма за енергетска поддршка која ќе го зголеми опфатот на граѓани на кои ќе им биде овозможена ваква поддршка“, нагласи министерката Шахпаска.

Во однос на неформалната економија министерката Шахпаска оцени дека Владата, преку систематски и мултисекторски пристап, како и преку повеќе мерки и проекти работи на формализација на неформалната економија.

„Во тој контекст се и мерките предвидени во Оперативниот план на активни програми и мерки за вработување, потоа Стратегијата за социјално претприемништво и законската регулатива за социјални претпријатија на која во моментов работиме, а кои ќе овозможат активирање на пазарот на трудот на најтешко вработливите. Секако работиме и на јакнењето на свеста за придобивките од формализирање на неформалната економија, но и организиран пристап во дејностите како што се земјоделието и градежништвото каде што неформалната економија е најзастапена“, додаде министерката Шахпаска.

Во однос на вработувањето на младите, министерката за труд и социјална политика нагласи дека младинските политики што ги спроведува МТСП и Владата дадоа позитивни резултати, односно доведоа до пораст на вработеноста кај младите од 15 до 29 години од 30,2 проценти во 2017 година, на 34,6 проценти во вториот квартал од 2021 година.