Тајландскиот шеф на армијата, една од најмоќните институции во земјата, соопшти дека војската нема да се вмеша во моменталната политичка криза во земјата, објаснувајќи дека сегашните закони на земјата се доволни да се спротистават на смртоносните протести во Тајланд.
Во телевизиско обраќање, генералот Прајут Чаноча изјави дека војската не сака да ја влоши и онака тешката ситуација.
„Доколку употребиме воена сила, нема гаранција дека ситуацијата ќе се врати во нормала“, изјави тој пред тајландската јавност.
Според него, сегашниот конфликт е поголем од конфликтот во 2010 година. „Војската не сака да употреби оружје врз сопствениот народ“, потенцира Чаноча.
Тајландскиот генерал потенцира дека со сегашната ситуација, уставните закони се ефективни.
Вчера, тајландските медицински претставници соопштија дека во протестите во државата, најмногу во Бангкок, од ноември загинале 20, а ранети се 718 луѓе, а јавноста дополнително беше разбранета поради неодамнешното загинување на тројца малолетници.
Премиерката на Тајланд, Јинглук Шинаватра побегнала од Бангкок, а се наоѓа на локација оддалечена од главниот град 150 километри, соопшти нејзиниот Кабинет, без да го прецизира местото на престој.
Апел за мир во Тајланд испрати и Генералниот секретар на Обединетите нации Бан Ки Мун.