Шефот на Муслиманското братство, Мохамед Бади, уапсен е пред полноќ, јавува Би-Би-Си, повикувајќи се на соопштение на Министерството за информации на Египет.
Шефот на Муслиманското братство бил пронајден во зграда недалеку од плоштадот Раба-ал-Адавија, во предградието Назр сити, каде што изминатата среда беа убиени 280 луѓе, кога силите за безбедност насилно го расчистија протестниот камп на приврзанците на соборениот претседател Мохамед Мурси.
По Бади се трагаше со недели, за обвинение – поттикнување на убиства.
По апсењето на Бади, Муслиманското братство најави дека ќе ја продолжи борбата против преодната влада и војската. Бади е само еден од многуте членови на Братството кои се длабоко вкотвени во египетското општество, појасни Ахмед Ареф, портпарол на движењето.
Преодното раководство во изминатите денови дискутираше и за забрана на исламистичката организација. Предлогот Муслиманското братство да се прогласи за илегално потекнува од преодниот претседател Хасил ал-Библави. Стотици членови на Братството беа уапсени во изминатите денови.