Денеска е ден во кој можеме да го поправиме она што го испуштивме во 2008 година, изјави министерката за одбрана Радмила Шеќеринска пристигнувајќи на самитот на НАТО кој започна утринава.
-Денеска е ден во кој можеме да го поправиме она што го испуштивме во 2008 година, рече таа пред новинарите.
Ова потсети на самитот на НАТО во Букурешт кога Македонија требаше да ја добие поканата за членство но беше одбиена поради грчкото спротивставување поради спорот со името. Во тоа време не помогна на инстистирањето и ветувањето на тогашниот американски претседател Џорџ Буш. Грција остана на својот став а неизговорената причина беше преименувањето на скопскиот аеродром и автопатот кон Грција со името на Александар Македонски.
Но денеска ситуацијата е поинаква а со договорот со Грција оваа земја се согласи да влеземе во НАТО. Земјите членки денеска ќе се согласат да и упатат на Македонија покана за да ги започне процедурите за зачленување.
-Мислам дека дури и на денешните дискусии на министерско ниво за надворешни работи и одбрана и на премиерско ниво, стана јасно дека една од недвосмислено најпозитивните одлуки на овој самит ќе биде поканата што ќе ја добие Македонија. Денеска сите ја искористија можноста да и’ честитаат на Македонија за огромниот пробив и целиот аудиториум не’ награди со аплауз зашто се свесни дека ова е историски ден за Македонија, но важен е и за НАТО, рече министерката за одбрана. И изрази уверување дека референдумот во Македонија ќе биде успешен.