Радмила Шекеринска, министерката за одбрана и потпретседателка на СДСМ, на денешната прес-конференција одговарајќи на новинарско прашање рече дека не е точна тезата дека скопското крило на владеачката партија не му дало доволна поддршка на претседателот Зоран Заев по писмото испратено од поранешниот лидер Бранко Црвенковски.
Министерката, која го презентираше буџетот на Министерството за одбрана за 2021, рече дека не треба да се мешаат партиските со државните интереси, односно не сака да ја меша партиската со владината политика.
– Она што ќе го кажам е да ве замолам да не ја правиме грешката на која бевме жртви 10 години. Да не ја мешаме државата со партијата. Ќе ми дозволите и јас да не ја мешам партиската политика со владината. Не е прилика да зборувам за тоа како министер за одбрана, рече денеска Шекеринска.
Таа дополнително, коментирајќи го македонско-бугарските односи, рече дека постои целосна согласност дека на овие теми треба да поаѓаме и од нашето анти-фашистичко минато, но и од интересите за државата да оди напред.