Опозицискиот караван за предвремените парламентарни избори предводен од претседателот на СДСМ Зоран Заев и заменик претседателката Радмила Шекеринска, синоќа остварија средби со жителите на Општина Битола. Заев и Шекеринска се сретнаа со граѓаните на битолските населби Долно Оризари, Кај чинарот, Баир, Јени Мале и Нова Битола.
„Битола не може да биде горда, кога редици луѓе стојат пред конзулатот на Бугарија и чекаат бугарски пасоши. Поради иселувањето на битолчани, денес веќе не знаеме дали Битола е втор град по големина во Македонија“, рече претседателот на СДСМ Зоран Заев.
„Република Македонија може и мора да се менува. Стево е човекот со кој ќе се гордееме кога ќе кажеме дека тој е нашиот претседател“, им вети Шекеринска на граѓаните на Битола.
Во текот на целодневната посета на пелагонискиот регион, Заев и Шекеринска посетија повеќе населени места во општините Демир Хисар, Могила и Новаци. На жителите од овој дел на Пелагонија чија основна дејност е земјоделието, им беа претставени новиот концепт и мерките кои СДСМ ги планира во оваа стратешка стопанска гранка.
Како позначајни, првиот човек на социјалдемократите ги издвои праведната распределба на земјоделското земјиште, навремената исплата на субвенциите на секој земјоделец, намалување на цената на нафтата и воведување на зелена нафта, како и укинувањето на персоналниот данок на доход за земјоделците.