Заменик-претседателката на СДСМ, Радмила Шекеринска смета дека Македонија го доживеа најголемиот пораз во евроинтеграциските процеси, а премиерот и владата треба да сносат одговорност.
„Сакам да изразам загриженост што Македонија со вакви одлуки останува на опашката на Западниот Балкан, наместо одговорност и план за акција, од премиерот и владата добиваме само обвинувања и оправдувања“, изјави пратеничката на СДСМ, на денешната прес-конференција по најавите дека Македонија и годинава останува без датум за отпочнување на преговорите со Европската унија .
Воедно Шекеринска изрази длабока загриженост за како што вели таа „застојот во евроинтеграциските процеси.
„Премиерот дрско бара алиби за неуспехот обвинувајќи ја меѓународната заедница, опозицијата и сите кои претходно предупредуваа дека Македонија е на грешен пат“, додаде Шекеринска.
Поранешната вице-премиерка за евроинтеграции им честита на Хрватска, Србија и Косово за постигнатиот напредок.
За случајот Кежаровски, на новинарско прашање од НОВА, дали СДСМ ќе се ангажира за негово ослободување, Шекеринска одговори дека партијата сака професионалните здруженија да решаваат, и доколку тие би настапиле јавно, тогаш би биле „обвинети“ дека ја злоупотребуваат несреќната ситуација на новинарот.
„Она што се случува со еден новинар, утре може да се случи со сите“, заврши пратеничката на СДСМ.