Радмила Шеќеринска и Зоран Заев денеска за НОВА изјавија дека немаат коментар за кандидатура за лидер, по информациите дека се ударната победничка двојка на Конгресот на СДСМ во мај.
Заев појаснува дека е премногу рано за било какви официјални коментари, со оглед на фактот што Конгресот се очекува да биде одржан дури кон крајот на мај.
Имено, по објавувањето на лидерот Бранко Црвенковски дека се повлекува од челничката позиција во СДСМ, започнува сезона на јавно објавување на амбициите на одредени членови за негов наследник, како лобирање во самата Партија, но и преку медиумите.
Засега, единствено Кире Наумов, екс- директорот на Агенцијата за разузнавање и во моментов најголем критичар на состојбите во СДСМ, јавно објави амбиција за кандидатура за лидер, но со услов- само доколку се случи реструктуирање на делегатите на Конгресот.
Сепак, неофицијално, за можна кандидатура за лидер на СДСМ се појавува и името на Игор Ивановски, додека амбиции, според нашите извори имаат и потпретседателот Зоран Јовановски, како и генералниот секретар Андреј Петров.
На претстојниот мајски Конгрес, според извори на НОВА, се очекува целосна промена на раководството на СДСМ.