Одговарајќи на новинарско прашање во врска со спорот за името, Шекеринска оцени дека е несериозно тоа што јавноста нема информации за тоа за какви предлози станува збор, ниту каков е ставот на Владата.
– Во последните неколку месеци слушаме информации дека преговорите се, како што велат, во зрела фаза, дека двете страни покажале подготвеност да прифатат некое решение кое го предлага Нимиц и притоа од нашата македонска влада добиваме едно и единствено, а тоа е молк. Немаме информации ниту какви се предлозите, ниту до каде се тие, немаме информација ни кој е ставот на македонската влада за тие нови предлози, рече Шекеринска.
Нема ништо тајно во преговорите, впрочем секое можно решение би требало прво да помине на референдум и граѓаните да се согласат на тоа, истакнува ВМРО-ДПМНЕ, реагирајќи на изјавата на Радмила Шекеринска во врска со спорот со името.
– Најдобра адреса за прашањето за името е Бранко Црвенковски, кој е креатор на проблемот, а сега веќе и директен извршител во создавањето на хаос. Овој хаос кој го предизвикува СДСМ се знае на кој му одговара, се наведува во реакцијата.
ВМРО-ДПМНЕ потсетува дека Црвенковски е тој којшто им ја наметнал референцата ФИРОМ на граѓаните и оти тој во почетокот бил против референдум. Нагласуваат дека тоа нема повторно да се случи.